പ്രവാസി മലയാളികളുടെ ആരോഗ്യ-അപകട പരിരക്ഷയ്ക്കായി കേരള സർക്കാരും നോർക്ക റൂട്ട്സും ചേർന്ന് നടപ്പാക്കുന്ന ഇൻഷുറൻസ് പദ്ധതിയിൽ അംഗങ്ങളാകാൻ ഒരവസരം കൂടി. പദ്ധതിയിൽ അപേക്ഷിക്കുന്നതിനുള്ള സമയപരിധി ഈ മാസം 18 മുതൽ സെപ്റ്റംബർ 18 വരെ ഒരു മാസത്തേക്ക് കൂടി ദീർഘിപ്പിച്ചു. ലോകമെമ്പാടുമുള്ള കൂടുതൽ പ്രവാസികളെ ഈ സുരക്ഷാ പദ്ധതിയുടെ ഭാഗമാക്കുക എന്ന ലക്ഷ്യത്തോടെയാണ് സമയപരിധി നീട്ടി നൽകിയിരിക്കുന്നത്.
നോർക്ക പ്രവാസി ഐഡി കാർഡുള്ള ജീവനക്കാർക്കും സ്റ്റുഡന്റ് വിസയിലുള്ള വിദ്യാർത്ഥികൾക്കും ഈ പദ്ധതിയിൽ അപേക്ഷിക്കാം. യുണൈറ്റഡ് ഇന്ത്യ ഇൻഷുറൻസുമായി സഹകരിച്ച് നടപ്പാക്കുന്ന ഈ പദ്ധതിയിലൂടെ അഞ്ചു ലക്ഷം രൂപ വരെയുള്ള സൗജന്യ ചികിത്സാ സഹായമാണ് ലഭ്യമാകുന്നത്. 70 വയസ്സ് വരെയുള്ള പ്രവാസികൾക്കും നിലവിലുള്ള രോഗങ്ങൾക്കും ഇൻഷുറൻസ് പരിരക്ഷ ലഭിക്കുമെന്നത് പദ്ധതിയുടെ വലിയൊരു പ്രത്യേകതയാണ്. കേരളത്തിലെ 668 എണ്ണം ഉൾപ്പെടെ ഇന്ത്യയിലൊട്ടാകെയുള്ള 24,000-ത്തിലധികം ആശുപത്രികളിൽ കാഷ്ലെസ് (Cashless) ചികിത്സാ സൗകര്യം ലഭ്യമാണ്.
ഭർത്താവും ഭാര്യയും രണ്ട് കുട്ടികളും അടങ്ങുന്ന കുടുംബത്തിന് 5,499 രൂപ മുതലാണ് പ്രീമിയം തുക ആരംഭിക്കുന്നത്. വിദേശത്തുവെച്ച് അപകടമരണം സംഭവിച്ചാൽ ഇൻഷുറൻസ് തുക പൂർണ്ണമായും ലഭിക്കുന്നതിനൊപ്പം ഭൗതികശരീരം നാട്ടിലെത്തിക്കാൻ 50,000 രൂപയുടെ അധിക സഹായവും പദ്ധതി വാഗ്ദാനം ചെയ്യുന്നു. കൂടാതെ, അപകടങ്ങളിൽ പൂർണ്ണ വൈകല്യം സംഭവിച്ചാലും അഞ്ച് ലക്ഷം രൂപ സഹായം ലഭിക്കും. ഒരു വർഷ കാലാവധിയുള്ള ഈ പോളിസി എല്ലാ വർഷവും പുതുക്കേണ്ടതുണ്ട്.
നിലവിൽ 1,32,000-ത്തിലധികം പ്രവാസികൾ പദ്ധതിയിൽ പങ്കാളികളായിട്ടുണ്ടെന്നും കഴിഞ്ഞ ജൂലൈ 31 വരെ 227 കോടി രൂപയുടെ ആനുകൂല്യങ്ങൾ അർഹരായവർക്ക് കൈമാറിയതായും നോർക്ക സി.ഇ.ഒ വ്യക്തമാക്കി. പ്രവാസികൾക്ക് തങ്ങളുടെ കുടുംബത്തിന്റെ ഭാവി സുരക്ഷിതമാക്കാൻ ലഭിക്കുന്ന ഈ സുവർണ്ണാവസരം പരമാവധി വിനിയോഗിക്കേണ്ടതാണ്.
Content Highlights: NORKA has extended the application deadline for its insurance scheme, giving expatriates more time to submit their applications. The extension offers additional support opportunities for eligible overseas Keralites.